مـن عـز نـومـي صـحـيـت....؟

من عز نومي صحيت وشفت فـي عينـي
دمع تهـادى علـى جفنـي وأنـا غافـي



ستـرت دمعـي بكمـي قبـل يغريـنـي
وأخذت هذا الجسـد مـن باقـي لحافـي



وسريـت تايـه ورى خطـوات رجلينـي
لا الوجه وجهي ولا أوصافي هي أوصافي



أمشـي وأقـول لطريـقـي لاتوديـنـي
لعيون نـاس تبـي تـدري عـن الخافـي



أمانتـك .. خلـهـا مابيـنـك وبيـنـي
خابرك يالـدرب خـوة عمـر وسنافـي



مـاودي النـاس تــدري وش يبكيـنـي
كرامـة النفـس ورث أبـوي وأسلافـي



أمشي وأحـس الخناجـر فـي شرايينـي
والبرد يمشـي وراي وينهـش أطرافـي



وحـيـد واللـيـل بـردونـه يغطيـنـي
تقـول كـن البلـد روح بهـا السـافـي



إليـن ماأوحيـت لـي صـوت ينادينـي
صوت أعرفه مثل ما أجهل وش خلافـي



قمـت أتلفـت وأنـادي ... لاتخليـنـي
ماغيره الصوت .. هـذا صوتـه الدافـي



ولمحت زوله من أقصى الـدرب لافينـي
مدري وش أقول لكن حـي هـا اللافـي



تعال .. شف غيبتك كيـف أثـرت فينـي
تعال .. شفني وأنا أغرق عقـب مجدافـي



تعال.. خذنـي ورحبـي مـن عناوينـي
تعبت أعدي علـى جمـرك وأنـا حافـي



تعال وإقطـف بصوتـك زهـرة سنينـي
كـل المواعيـد عقبـك شمعهـا طـافـي



تعـال وإزرع خصـل شعـرك بكفينـي
بضمهـا ليـن أحـس بليلـك الظـافـي


تعال وش فيك خايـف ؟ أنـت ناسينـي ؟
قطعت صوتـي عليـك وطـال ميقافـي



حتى بديـت أشعـر إن الحـب معمينـي
وإن أنت حلم عثـى فينـي وأنـا غافـي



لكن أمانـه تـرى اللـي فينـي كافينـي
إن رحت منـك كـذا مارحـت متعافـي



بصّـدق الحلـم وأحـذر لا تصحيـنـي
في خاطـري كلمتيـن وإن قلتهـا كافـي



أمانـة الله عليـك إن غبـت عـن عينـي
لا يكون قلبك مثل قلـب الزمـن جافـي



مـع كـل دمعـه تذكـر رعشـة يدينـي
ومع كل ضحكـه تذكـر قلبـي الوافـي