روتين مكسور ..!!<< صحرواي في التنهات !!
اللي داخل الموضوع وهو فاهم العنوان غلط .. لا يطلع ترى الدعوى حول حريه !
مسكت معي أسوي تصفية مكينة وأنحاش عن زحمة الرياض ودخان المصانع << أقعد يا المصااااانع ( اللي ما يعرف ديرتنا يقول ما شاء الله عندهم صناعة وشغل .. ما يدري انها مصانع كاسات بلاستيك وباغات ) !!
قررت أكسر روتين حياتي وأعيش حياة فطرية في الدهناء لمدة عشرة أيام بلياليها ( شاملة وجبة الإفطار .. والاستقبال في المطار ) <<< وجه واحدن متعوّد اذا بغى يسافر يقول لأهله انه بيروح للبر!!
كنت مصمم اني أبعد عن أي شي يذكرني بالحضارة والدلع !!
كنت ناوي أعيش حياة بدائية ( أمشي حافي .. وأفترش الأرض وألتحف السماء ) <<< الله من زود الصتز ... بعد .. ما تسنّه محمّلن معه مرقدن وزنه نصف طن ( مطرحة قطن أصلية أم ورد أحمر رويانتن من الموية الصفراء ام رغوة . . وكنبل كاروهات رابصن ديزل وزيت محروق عقب غرفة مكينة الماء في المزرعة .. ومخدّة ريش تسنّها عضد ام سبعطعش ) !!
^
^
^
^
مستحي يقول انه لاقط ذا المخدّة من طريق الملك فهد ( طايحتن من ونيت ناقلن له عفش مطلقة ) !!!
الموضوع :
في ربوع الدهناء وبعد ان قطعنا عروق(ن) واجد .. كل عرق له اسم ما أدري وش يبي ؟ ( عرق التنهات .. وعرق الحمراني .. وعرق الكناسية .. وعرق السراوة .. وعرق الرويكب .. وعرق السرو .. وعرق عمر .. وعرق في يد مطوّع بيتلوّى على ظهر داشر ) <<<< طرّاه ان بعض الناس يقرون ذا العروق ويهوجسون بالطق !! ولا تهون ( عروق نجد ) !
الحقيقة كان توقيتنا للرحلة خيااااااااالي . . جو مسكّت وبروق ورعود وأمطار وخير .. وربيع .. وفسقه .. من زود الفسقه قدمنا على بلدية تمير عشان تفتح عندنا مقبرة خرفان !!! <<<< فطور وغداء وعشاء وحلى لحم !! ( صابنا غلاث من كثر ما ناكل لحوم حمراء ) .. !! ( وجه مستحي يقول مشتهي لحم أبيض عشان الناس اللي نيتهم شينة )
طبعاً كان محل اقامتنا مع ناس(ن) مضيعين أعمارهم على تربية بعارين مافيه أمل تتربى وتعقل وتصير مثل الناس !! <<< وجه واحدن راجفته ناقة وقايلتن له لا عاد أشوفك واقفن حول ديدي يا قليل الأدب !!
تصدقون ان واحدن منهم من زود حبه لبعارينه .. متحلّم بوحدتن من البكار !! بيني وبينكم انا كنت ناقدن عليه .. بس يوم شفتها .. وشفت بياضها .. وعيونها ذا المكحله .. تعوذت من بليس .. وعرفت انها فتنه !!
وعشان أطلع من جو الفتنة . . ولا عاد أهوجس في ذا الخنبقة اللي ما وراها إلا ( حساسية بذور اللقاح .. وروائح الزبيدي النفّاذه .. والسباحة في ذا البرد ) قررت اني امارس رياضة المشي !!
فسألت أهل المحل اللي يبخصون المنطقة . . عن أقرب شارع حوامل عشان أمشي فيه . . وعرفت الجواب عقب ما شفت واحدن من الشّياب رافعن يديه للسماء ويقول : اللهم لك الحمد .. عسى اللي بلاك وانا عمك يعافيك ولا يبلانا !!
بغيت أتهور وأرد عليه وأقول .. ليتهم رقدو !! بس تذكرت انه كبير سن وله حق . . وعيب اني اتكلم عليه أو أغلط عليه ( وجه واحدن يقول .. وش رايكم ما أنفع مع حقين مواهب وأفكار ) << أو هي أفكار ومواهب ؟؟ ( هذي تالية اللي يتابع برنامج الراعي الرسمي له رز أبو كاس ) !!
اقترح علي الشايب اني امشي مع الراعي وأطرد ورى ذا الحيران وامهاتهن . . وقال لي : انتبه لا تقرب الفحل . . تراه مزاج تكروني ( ولا يهون محمد نور ) !!
خلك حول ذا الخلفات ومع البكار . . ولا تفكر واجد وانت تناظر ديودهن وشمايلهن !! ( الشماله بنت عم السنتيانة بس ما كملت دراستها ) !! <<< شكل ذا الشايب قد عاش جو فك الشمالة .. وهو يهمس في اذنها .. بكلمات القردنة المعهودة في مثل هذه المواقف الخاثرة !! وكما قال الشاعر الغزلي .. نزار قبّاني :
داعبتو بأصابعي خيوط الصوف ..
وحللتها عوقدتون عقدة ..
وهمستها في أذنها : دري لي الحليب فالطاسة في يدي !
وإلا ترى بقعد كل الليل ألمّس في ديودتس الين يوقف شعر راستس !
^
^
ياصبر ذا الخلفات على تلميس الرعيان !!
طبعن .. انا ما كذبت خبر .. ومشيت ورى النوق !! <<< جمع ناقه .. وقالت العرب انها كذا صح !!
مع اني اشوف انها المفروض تجمع ( ناقات ) !!
اقولكم ليش ؟ عشان كلمة ( باقة ) تجمع ( باقات ) !! وكلمة ( باغة ) تجمع ( باغات ) !! ليش كلمة ( ناقة ) تجمع ( نوق ) ؟؟؟ ليه مهوب ( ناقات ) !!
مشيت ورى ذا البعارين .. وبدل ما أكون راعي .. صارت هي الراعي الرسمي لحفل تتويجي كأبرز كمخه يسمع بحركات البدو . .. وقامت تمشي على مزاجها وانا ماغير أهرول وراها !! <<< المشكلة اني مسوي فيها راعي بعارين وأغني ( وراها .. وراااااااااهااااا ... بمشي وراها ) !!
يوم غابت الشمس .. ولا ما عندي من يقول ربي الله !!
أثري أبعدت عن الناس .. وقطعت مسافة طويلة وأنا فاصل العدّاد !!
ابي اشوف نور .. خيمة .. انسي .. جني .. مااااااااااش .... ما حولي احد !!
حتى البعارين اللي منوّل معطيتني وجه . .. قامت تخور علي وتحارش . . وما قهرني مثل ذاك (القعود) جعله ما يكبر !!
من يوم غابت الشمس وهو يتفّل علي ويرجمني بالحصاء .. حتى يوم كلني البرد وبغيت ارقد في ذراء ذيك القشعه طلباً للدفء << القشعه يعني شجرة صغيرة ما عرفت تكبر من ذا الرمل اللي حولها !! ( لمبه مولعه مثل اللي في أفلام كرتون )
جاء القعود الوصخ . . وقام يستعرص علي . . مرتن يجي وراي ويسوي نفسه ياكل علك <<< وجه واحدن ماقد شاف بعير يجتّر !!
ومرتن .. يجي يتحكحك عندي !! ويبيني أفليه !!
يوم شفت انه مصخها .. وحسيت انه ممكن يفهم سكوتي غلط . . ويحسبني من ربع ( مافيه كدااا ) قمت وطمرت من محلي وقبصته مع كتفه . . وسريت بالليل هايمن على وجهي !! ولا بينت اني ضايع عشان ما ينقدون علي البعارين وكنت أقنع نفسي اني متزدي في شغلي من مبداء وحكمة الفنانة العربجية اللي ما تحمل من الجينات الأنثوية شي أبد الفنانة ( فيفي عبده ) هو أحنا حيلتنا أيه غير الشرف !!
وكل الليل وانا أمشي .. ومرتن اطيح في شجرة .. ومرتن اتدرباء من فوق طعس ! <<<< تصدقون اني رحمت نفسي .. وانا قاعدن اكتب !!
يوم شق السفر .. وطلع الصبح ... وأشوف ذاك المخيم اللي تسنّه معرض الوعلان للسيارات !!
خياااااااااام .. وكرفاااانااااات .. و دبابات صحراوية وعربات تجرها خيول .. وخيول قصار بس قليلين أدب ( وجه واحدن شايفن له رجل خامسه ) !!
ومكينة كهرب ( أبراي لله ان تسان مكتوبن عليها الحرس الوطني ) .. وشغالات يدورن أي عذر عشان يطلعن من المخيم <<<< شايفن وحده من الشغالات واقفتن بمكنستها فوق راس طعس يعني ترى مهوب قصدي أطلع بس الطعس محتاج من يكنسه !! ( وجه واحدن يقول يا شكواااي لله ) !!!
دخلت المخيم .. يوم توني باغي اتنحنح واصيح على أهل المحل .. يوم أنطلق علي ذاك التسلب اللي تسنّه بعير من كبره !! وكان منطلق بسرعه جنونية ( أوحي جرس السرعة يرن وهو هناااااااااااااك ) << قاعدن يشّر بيده !!
المشكلة انه مهوب ينابح .. الظاهر انه أطرم !! أو مقزّز الدريشة أو مقصّر من النباح كل الليل !! <<<< تصدقون أول ما شفته وهو يركض ومطلّع لسانه أحسبه يتهيبل !! ( وجه واحدن يماشي ماصلين اذا بغو يتهيبلون طلعو ألسنتهم وحطو أصابعهم في أذانهم ) !!
يوم شفته وصلني .. قلت : ما بدّهااااااااش ياروح ما بعدك روح . .. وانا أدف باب الكرفان وأدخل واردع بالباب وراي !!
يوم التفت وأشوف على السرير ( صبيه في العقد الثاني من العمر ) نايمتن على بطنها .. وكافتن رجل .. ومادتن رجل .. وصارين قفاها تسنّه نثيلة ضب !!!
كانت تغط في نومن عميق .. وسعابيلها ناقعتن جنبها تسنّها قارورة عسل لانجليز منكسرة على بلاطة رخام !! <<< لو معي ذيك الحزة قطعة خبزه تسان غطيتها في ذا العسل وقمت أرشخ !! بس ماااااااش ما كان معي إلا شابورة !! وأصعب شي انك تغط الشابورة بذا الطريقة !!
الوكاااااد اني قعدت متنّح .. وأناظر في ذا النثيلة حوالي خمس دقايق تنقص شوي !! وكنت ناوي اخربها وأحطم الرقم القياسي في قز النثايل في روضة التنهات ... لولا اني تذكرت المقولة المشهورة .. اللي تقول : كبر النثيلة .. من كبر الجحر !! <<< على طاري القز .. بعض الشباب اذا جاء لأهله تالي نهار الجمعة ولا اللي حول عيونه صايرن أسود من كثر ما يرص الدربيل على عيونه !!
( الله يلوم اللي يلومهم .. بعض البنات تشوف السيارات والناس حولها وتستهبل زود وكل شوي تلبس بنطلون شكل مرتن أحمر ومرتن أزرق وفي الليل تلبس فسفوري عشان تضمن انهم يشوفونها ) !!
تعوذت من بليس .. وتنحنت ... ابي ذا البنت تقوم قبل لا يقوم عليها حق !! << أجل ذا اللي ما تستحي منسدحه على بطنها ما تسنّ عندها رجال !! إلا عليها حق ونص !! ( وجه يقول : يازين الحق اذا صار تيس في البرميل ) <<< عاش مصرّف !!
تقّطع حلتزي .. وبنت الناس .. ما جابت خبري .. ( الله لا يعاقبنا .. تسنّها جيفه ما تحرّك أبد ) !!
قربت يمّها شوي .. يوم شفت عفط(ن) في ورتسها وزراااااااقن خفيف . . شكلها كل النهار وهي راكبتن على دبّاب وتستهبل الين مرج لحم فخذها من الرص والحرارة . .. ( بعذرها ما درت عني ) !!
قلت مالي إلا اني اهزها شوي كودها تقوم !! <<<< ظنكم لو اني هزيتها بتقوم وإلا بتقول منيب عمة أحد !!!
يوم جيت بلمسها وأتذكر ذاك اللي رجفته الناقة ! قلت وش الله محدني ألمسها ثم ترجفني و لا عاد يجيني عيال وأتوهق !! <<< ضامن ان رجفتها بتجي في المنطقة الحسّاسة !!
قلت خل المسها من وراء حجاب !! وألقط عصا ذيك المكنسة ( غير مكنسة الشغّالة اللي فوق الطعس ) وأنغزها مع جنبها . . الله يعافينا . .. يوم نقزت تسنّها مقروصه . . وهي تصرخ ذيك الصرخه اللي خطرن يوحيها ( بشار الأسد ) وهو يهوجس يطلع من لبنان وإلا ما يطلع !!! <<<<< طرّاه ان الواحد اذا قام يهوجس ما يوحي احد !!
يوم شفتها تصارخ .. قمت وأنسدحت وسويت نفسي مغمى علي !! <<< هماني مطقوق مطقوق الله لا يعوق بشر .. أخذها من قاااااصرها ويغمي علي اصرف من اني انجلد الين يغمى علي !! ( وجه واحدن فوق راسه لمبه )
يوم شافتني منسدح تسنّي زوليتن طاقها المطر ... سكتت .. ثم خذت جوالها ودقت على ابوها .. وقالت : يوبه .. يوووبه .. الحقني ... فيه واحد داخلن علي في غرفتي !! <<<< يا صبر ذا الأبوان على ذا المبزرة التالين ... الحين غرفتها جنب غرفة ابوها .. وتدق عليه جوال .. ورى ما راحت على رجلينها جعلها الكسر !! ( وجه مكشّر ويضرس من القهر ) !!
جاء ابوها يركض وهو يزيّن صرواله .. وحرمته في ساقته لابستن روب أصفر فوق العباية <<< تسنّها من حقين الملاكمة اذا قامو يهايطون وهم من جنبها !!
^
^
لو يشوفها ( البلوي ) بذا الطقم عطاها عضوية شرفية في فريق الإتحاد !!
يوم دخلو الغرفة ... ويروحون يخمخمون في بنتهم ويتفقدونها . .. ويكشفون عليها <<<< أمها من زود الحرص جايبتن معها كشاف ( ياهي قعدت تطلطل في سر بنتها .. الين طلع النور مع اذنها ) !!
يوم تأكدو انها شد بلد ... ولا مشى عدّادها ولا متر ... قامو والتفتو علي .. ولا مافيني عرق(ن) يحترك ( ميت إلا شوي ) !! <<< طبعن كنت منسدح على بطني عشان جوالي ما يستقبل إرسال .. ثم .. يرن وأتوهق !! ( طرّاه ان نقعة العسل لعبت في حسبتي ) !!
قام أبوها .. وقلب جسمي برجله !! <<< تسنّه ذاك اللي لقى سنتيانه وقلبها وضاق صدره يوم ما لقى في وسطها شي !!
يوم قلبني .. وشاف خشتي يابسه وعيوني متقلبّه درى اني أعيش تفاصيل مرحلة الرعشة ( من البرد والخوف ) مهوب من شي ثاني ( طرّاه العسل ) !!
الحقيقة أبوها صار رحوم . . ورحمني .. ونادى العمال وقال خذوه وحطوه في خيمة الضيوف الين يصحااااء واذا صحااء أعطوه ( مذقة لبن ) و ( تمره ) وخلوه يروح لأهله !! <<<< بيني وبينكم يوم سمعته يقول ( مذقة لبن ) ارتعت وقلت : عسى مهوب ذا ( القعود ) اللي يتعيرص علي .. متجنّس ومسوي روحه آدمي .. عشان يمذق علي !!
قمت وطمرت ... ونصيت المسفلت .. وأشرت لأقرب لموزين ... وللرياض !! بلا بر بلا طبيعة بلا خراط فاضي !! <<< ألزم ما على الرجال نثيلته !!
ما يستفاد من ذا الخنبقة :
شي جميل ان الواحد يكسر روتين حياته .. برحلة برية .. ويترك الحضارة وراه !!
البعارين حيوانات صح ... بس مزاجها لك عليه شوي !!
التنهات ... بالنسبة للبر ... مثل اللي يقارن شارع العلياء العام ...بدوار ام سليم !!
الشباب في التنهات مستغني عن القنوات الفاضائية بالدرابيل !! ( النهارية والليلة ) !!
الدبابات في التنهات بتخرّب أرداف بعض الناس !!
أهل اللموزينات .. وصلو التنهات !!
تحياتي !!
كلها منقوله ما كتبت الا <<<<< هذا بس والعنوان
22-03-2005, 02:20 PM
قصه اعجبتني وابنقلها كامله(تموت من الضحك)
