احترت وين احط هالمشاركه .. قلت القصص ويالله

s_j · 07-12-2006, 07:53 AM

قصه ولا كل القصص:

كان هنالك شاعر معروف بالغزل اسمه عثمان الهزاني

وكان عثمان اذا رأى امرأهـ جميله لا ترضى قريحته الا بكتابة قصيدهـ ..

فكان ابن الشاعر عثمان ( محسن ) اشد ابتلاء من ابيه

فكان اذا رأى أو سمع عن امرأهـ ..؟ لا ترضى قريحته الا بكتابة قصيدهـ ..

فكان للشاعر محسن ابن واحد واسمه ( سيف ) وكان شاعرا ً

فقد درج الإبن ( سيف بن محسن ) في بيت والدهـ الشاعر محسن بن عثمان الهزاني ..

في بيت أدب وبلاغه وشعر وحكمه .. بيت عز وكرم ..

ففي هذه البيئه الخصبه الشاعريه نبتت شاعرية سيف في وقت مبكر

وكانت تنمو باليوم ..

وبدت على سيف سمات الذكاء والفطنه المتوقدهـ فخاف والدهـ الشاعر محسن من أن يسلك سيف طرق الغزل لأن والدهـ قد تاب من هذا النوع من الشعر ..

فلقد روي انه حبس ابنه ومنعه من النظر إلى النساء والفتيات منذ صغرهـ !!

خوفا من ان يقع في ما وقع فيه ابوهـ ..

حتى انه لم يكن يعرف اشكال الفتيات وجمالهن فذات يوم اتى السيل ( نتيجة الأمطار الشديدة )ليفتح لسيف فتحة في الجدار فخرج منها ..

ورأى أمه وهي تمشط إحدى فتيات جيرانها ..

فسأل امه , ماهذا ؟

فقالت له : هذا الذيب

>>> ( ابتلشت المسيكينه )

فرد الطفل "سيف " منشدا :

الـذيـب مـالـه قـذلـةٍ ٍ هلهلـيّـة

ولا لـه ثمـان مفلّجـاتٍ معـاذيـب

والذيـب مـا يمـشـط بالعنبـريـة

لا وا هني من مرقدهـ في حشا الذيب !!

فعندما علم محسن بذالك ارسل ابنه ذا الـ 6 سنوات الى الامام ليعلمة القرآن ..

فقال الأمام لسيف: أتعرف الأبجدية ؟

قال سيف لأ ..

قال الأمام أتعرف ألف(أ)

قال:

ألف ٍ أولّـف مـن غريـب الفنونـي

من حب ّ سمر ٍ مدعجـات العيونـي

ما هو هوى لي يامـلاف اعذرونـي

بلوى عسى ما يبتلـي الله الأجـواد

أنا أن بلوني يالعـذارى فأنـا اللـي

أقلط علـى القيفـان واخـذ واخلّـي

يامن له الشكـوى دموعـي تهلـي

دبّ الليـالـي ماتهنّـيـت بـرقـاد

قال الأمام باء

... !!

البـا بليـت بحـب غـر ّ الثنـايـا

عفر ٍ بـروس مشرمخـات البنايـا

هنّـي ياستـر البـنـي بالهنـايـا

من يتلى اللـي ذبّلـه مثـل الابـراد

جيد المها والعنـق عنـق الغزالـي

عنق الفريد اللي جفـل واستشالـي

يالله يامنشـي حـقـوق الخيـالـي

تنجي خليل ٍ فـي كنـان الحشـا زاد

والتـا ترانـي ناحـل ٍ كالعليـلـي

دهش ٍ وخلّـي دالـه ٍ مـادري لـي

إن مانظر لي نـور عينـي خليلـي

وإلا ترانـي لحفـرة الـمـوت وارد

الموت عندي متّسـي ٍ "1"والحياتـي

إلا إن سقاني نـور عينـي شفاتـي

يسقـي زروع ٍ بالحشـا هايفـاتـي

من ما ثنايـا كالجحاليـل نضّـاد"2"

الثـا ثليلـه فـوق الأمتـان وافـي

ومجدلّه يسبـي العشاشيـق ظافـي

والخشم مصقول ٍ غـدا بـه سنافـي

قرم ٍ إلى شـاف أوّل الربـع ردّاد "3"

قـرم ٍ سنافـي لاحضـر بالدبيـلـة

يردّ من خـوف اللوايـم تجـي لـه

إلـى ابجلـوا حيضانهـا للفتيـلـة

يرمي إلى سمـع الزعازيـع بركـاد

الجيم جلّ اللـي خلـق نـور خلـي

وحسن التهايا مقعـده فـوق زلّـي

شبه القمر شفته وهو ما فطـن لـي

أوجس صوابي يابن فيحـان يـزداد

بالله يـامـروي شـبـاة الرهيـفـة

لعيـون بـرّاق الثنـايـا حليـفـه

ياقلـب ياللـي مثـل كافـور ليفـه

يبست عروقه حايـل ٍ عقـب جـدّاد

الحـا حلفـت ويشهـدون الخلايـق

إنّـه كمـا الـدرّة بوسـط الرفايـق

ياقلب ياللي من شقا البيـن ضايـق

حارب لذيذ النوم والشـرب والـزاد

الـزاد ماكـول الـمـلا مابغيـتـه

لي جت كواريـج المغـارب رميتـه

عن كان مجمول الحـلا مـا وليتـه

فـدنّوا لي من نقوة الهجـن وشـداد

الخـا خديـده بالدجـا لـه لعيجـي

والعين هي ويّا الهدب لـه لجيجـي

خوتم على قلبـي وطيّـر هجيجـي

وبنى بقلبي له مقاصيـر وعقـاد"4"

عقـاد ياللـي ماكـر الغـرّ يغويـه

تمشي على الطاعة لعينـي قوافيـه

إن كـان مايـدري فحنـا نعـاديـه

ترف الحشا نورهـ زهى الوجه بفـراد

الدال دعنـي ياعشيـر السكـارى"5"

نعدي عليهـم ميـوة ٍ مـع غبـارا

ننخى هل البـارود وأهـل المهـارا

واللـي يـذّل مـن الملاقـاة شـرّاد

شـرّاد ياللـي مـن قرينـه يذّلـي

ليا منّ ضرب بالسيف بالربـع حلّـي

أمشي على الطاعـة لعينيـك ياللـي

عزله كما عـزّل اوّل الريـم منقـاد

الـذال ذالـي حـزّة اربـع سنينـي

أعول كما تعـول خلـوج القطينـي

خـذوا ولدهـا سربـة ٍ معتديـنـي

قامت تحـنّ وتختبـط بيـن الاذواد

تحسب اهـل الاذواد لـه صادقينـي

قلبـه تكسّـر مـن كثيـر الحنينـي

ماترحمـون القـلـب يالعاذليـنـي

خلوهـ يوجف من هوى الزين وش عاد

الرا رمانـي يـوم لبـس المعانـي

بمجدّل ٍ يشبـه عريـش الحصانـي

إلـى ضحـك بمبلّجـات الثمـانـي

برق ٍ غطاهـ النوّ مـن عقـب رعّـاد

بزيـاد يــروي حـربـة ٍ للهواوي

ماظـنّ يبـري لو تطيـب المكـاوي

يـاربّ لاتقطـع شفـاة الـرجـاوي

دنّوا لنا من نقـوة الهجـن وشـداد

والزاي زاهي الوشم في نـور خـدّهـ

ومجـدّلات ٍ فـوق متـنـه تـكـدّهـ

لاواهنـي مـن بيّـح اليـوم شـدّهـ

وحارب لذيذ النوم والشـرب والـزاد

الـزاد مطعـوم المـلا مـا بغيتـه

ولو جمّعوا مـال البواشـه وميتـه

مـادام ذبّـل صاحـبـي ماوليـتـه

عسى محبّتهـا علـى زيـن تنقـاد

فأوقفه الأمام عند حرف الراء .... !

وقال له أخرج : أنت مثل أبوك وأسوء..

رحم الله سيفا ..

فإنه كما يروى مات صغيرا ولا يوجد له سوى هذه القصه والألفيه وربما لو .. امتد به العمر ..

لأضفى على الساحة الشعرية الكثير ولا غرو فهو ابن الشاعر الكبير محسن الهزاني ...

رحم الله جميع موتى المسلمين

منقول

(( ديوان محيسن الهزاني ))

الان ... اللي قرى هذهـ القصه ..؟ هل يقتنع أو يشكك فيها ( مثلي )

انا بصراحه ماصدقت ..

نظرا ً لحداثة سن الشاعر .. لكن سويت بحث بالموظوع هذا

وقطعت الشك باليقين .. ( الله يرحمه )

تحياتي للجميع

بعدهم · 07-12-2006, 07:58 AM

وين الناس ياحلوه ماعاد نشوفك

اولا محسن الهزاني هذا شاعر رائع ومتمكن وليس بغريب على ابنه هذا

بل هذا الشبل من ذاك الاسد

اما عن السن فأتوقع انو اكبر بقلين من ست سنوات وهذا لايمكن كونه مبدع وموهوب رحمه الله

والموضوع مثبت لروعته ولفرحتنا بعودتك خيتو..

s_j · 07-12-2006, 04:03 PM

وللهزاني محسن قصه طريفه في بداياته الأولى حينما أرسله والده (للكتاتيب)

ليتعلم مبادئ الكتابه والقراءهـ فأراد الأستاذ تدريسه فقال له (ألف) ..

فقال الهزاني:

ألف وليف الروح قبل أمس زرناهـ

غروٍ يسلي عن جميع المعاني

فقال له الأستاذ قل (باء) وهو يريد تحفيظه فقال الهزاني:

البا بقلبي شيّد القصر مبناهـ

وادعى مباني غيرهم مرمهاني

فقال له (تاء) فقال الهزاني:

التا تراني كل ما أوحيت طرياهـ

أفز لو حلو الكرى قد غشاني

وهذا الأستاذ ينطق الحروف وهو يجيب عن كل حرف ببيت من الشعر يبدأ به الأستاذ حتى انتهى من حروف الهجاء وفرغ الهزاني من نظم القصيدهـ

فقال الأستاذ للهزاني: ارجع لوالدك فلست بحاجة إلى الدراسة

( وانا اقول الحلو سيف من وين جاب هالقريحه اثر مثل ماقلتي ياقلبي بعدهم )

( ذاك الشبل من ذاك الأسد )

اشكر لك ( انك للحين مانسيتيني

)

اصلا ً انا خجلانه ودي اسلم عليك بس قلت هاهـ ؟

يمكن نستني البنت

ع العموم اشكر لك مرورك وتثبيتك للموظوع

مع فائق الإحترام