أبو صالح وأبو راشد
بعد صلاة العصر يسولفون ويقطعون الوقت أبو صالح جالس مع أبو راشد
تنهد أبو صالح وقال: أفكر في هالدين العظيم اللي طلع من مكة المكرمة ووصل إلى آخر الدنيا !!
قال أبو راشد: إيه والله إنك صادق يا بو صالح...
قال أبو صالح: بس لا يهمونك دين أهل آسيا الوسطى وأوربا والله مالهم من الإسلام إلا اسمه !!
رد أبو راشد: والله إنك صادق يا بوصالح
وأضاف أبو صالح: ولا دين هالأشوام (أهل الشام) والله دينهم ما هوب اللي إنت تبي يا بو راشد
فرد أبو راشد: والله إنك صادق يا بو صالح
قال أبو صالح: والا هالأفارقه والمصاريه والسودانين متصوفه مبتدعه ما عندهم من الإسلام إلا المظهر
قال أبو راشد: ايه والله يا بو صالح إنك صادق...
قال أبو صالح: إن بغيت الإسلام في ها الديره (السعودية)
قال أبو راشد: ايه والله إنك صادق يا بو صالح...
فرد بتنهد أبو صالح: والله ماهوب دين كل أهل هالديره على اللي إنت تبي يا بو راشد؛ أهل الجنوب أهل بدع وزيدية وإسماعليية مالهم من الدين إلا اسمه
قال أبو راشد: ايه والله إنك صادق يا بو صالح
قال أبو صالح: والا أهل الشرقية رافضة وشيعة والله ما خذوا من الإسلام إلا اسمه، وأهل الحجاز مبتدعة صوفية ماهوب والله اللي إنت تبي يا بو راشد
وأضاف أبو صالح: إن بغيت الدين والله في نجد والباقين خلهم على يسراك
رد أبو راشد: والله إنك صادق يا أبو صالح...
قال أبو صالح: والله بعد ماهوب كل أهل نجد دينهم على اللي إنت تبي! أهل الرياض واللي حولها شرابين للتتن (الدخان) ويشوفون الدش والله ما أدري عن دينهم يا أبو راشد !! لكن لابغيت الإسلام تراه عندنا بالقصيم !!
رد أبو راشد: والله إنك صادق يا أبو صالح...
فأضاف أبو صالح: والله ماهوب كل أهل القصيم دينهم على اللي إنت تبي، أهل عنيزة واللي حولها يبعون التتن ويلبسون كبك والدشوش تملأ السطوح،
إن بغيت الدين والله تره بذى عندك ببريده
رد أبو راشد: والله إنك صادق يا أبو صالح...
وأضاف أبو صالح: والله ماهوب دين كل أهل بريده على اللي إنت تبي!!! طلعت هالاستراحات وما يندرى من اللي يشوف الدش ومن اللي مايشوفه
إن بغيت الدين إنزل ترى في حارتنا هاذى !!
رد أبو راشد: والله إنك صادق يا أبو صالح...
قال أبو صالح: والله بعد ماهوب كل أهل الحارة على اللي إنت تبي، أشوفه يسحبون رجليهم للمسجد تقل إنهم مغصوبين على الصلاة !!
والله ما بوه في الحارة إلا أنا وإنت يا بو راشد !!
رد أبو راشد: والله إنك صادق يا أبو صالح ...
أضاف أبو صالح: والله إني أشوفك مانتب تخشع في الصلاة يا بو راشد !
20-06-2007, 12:01 PM
أبو صالح وأبو راشد
رد: أبو صالح وأبو راشد
