هاي شلة..
بدون مقدمات وديباجيات مال أمها داعي على هالصبح.. فلقد قرع ناقوس الخطر بارتفاع اسعار المواد الغذائية..ومع ارتفاع االأسعار يُقابله ارتفاع الوجبات الجاهزة المُعدة خارج المنزل (
ببساطة معادلة طردية).. يعني سندويش الكافيار بدل ماكان بخمسيمة ريال صار الحين بالف ريال!!!(
اكيد تعرفون الكافيار؟؟ اللي هو بيض الحوت)..الحين بيجيني واحد فتيت ذهيين ويقول الحوت يولد مايبيض فبلاش تسوي فيها فاهم علينا يا فيصل بن محمد.. برد عليه واقوله: يعني مشت عليك سندويش الكافيار ومامشت عليك بيض الحوت؟؟ خخخخخ
نعود لموضوعنا وبلاش نخرج عنه مرة ثانية..من تالي شفت بعض الاخوان ماغير يحطون صور للاكلات والطبخات..هذا بخاطره طبق دبابيس(د
غابيس) وحط الصورة..وذاك بخاطرة بلازانيا(
وحط الصورة)..
الى متى؟؟ وحنا نحط صور؟؟ نبي المقادير ترا في ناس تعرف تطبخ..في ناس مستأجرين شقة جايه معها مطبخ ويبون يحللون هالايجار لو على حساب حرقة العمارة
&&&&&
مطبخ فيصل بن محمد
في معلومة لابد انكم تعرفونها...تراني انا اللي أطبخ..وكل يوم باذيني الشباب مو حبًا بدبابيبي..لانهم يعشقون طبيخ فيصل بن محمد..
واليوم وانا اعد فطوري قررت اني اصور لكم خطوة بخطوة (ستيب باي ستيب) لفطور فيصل بن محمد .....
نبدأ اولا بالقهوة العربية
(1)
"اللهم بلغنا رمضان.." دعاء لاتنسونه يااخوان..وكثير من الاخوان مايعرف يضبط قهوة عربية..آخر مرة زرنا فيها
دوودي..قدم لنا ببسي!! وش ذا الحتسي؟؟ وبما ان قهوتي اللي اضبطها ماخذه سمعة خطيرة... اليوم راح افيد اخواني وحبايبي العزاب كيف يضبطونها..
بداية : لازم يعرف كل شخص ان البن العربي انواع بري ،هريري، جبلي....الخ ومافي شي ازين من شي الناس مزاجات انت جرب الانواع الين تشوف اللي يجوزلك..يعني تروح لراعي القهوة وتقوله ابي بن هريري نص غامق ونص متوسط وخلها يطحنها لك بس يفضل يكون الطحن متوسط يعني مو ناعم(
علشان المزاج افهم).
بالنسبة لي انا وقهوتنا لهل اليوم انا اجيبها من محل إسمه: بن بايوني . عنده بن خاص يجيبه حصري له ويقع خلف شارع السويكت.
المقادير
1- ترمس ثلثينه ماء . واذا كان دلة قهوة نحاسية تبي تسوي فيها انك ببر نفس الشي ثلثينه ماء
2- اثنين الى ثلاثة ملعقة هيل مطحون (
وماعليك من ذول اللي يطحنون الهيل مع البن تراه قوي بالحيل للشيبان وما فوق)
3- ربع ملعقة صغيره مسمار مطحون
4- ربع ملعقة صغيرة زعفران
5- ثلاث ملاعق كبيرة بُن (
عاد حسب النوع اللي اخترتة بس زي ماقلنا لاجا يطحنه يكون وسط مو ناعم ولاخشن)
الاعداد:
إغلي المويه ببريق ..واذا بدا يفوور الماء ..ضع الثلاث ملاعق من البُن عليه..وبعد كذا خفض حرارة الدافور لاقل شي خله يطبخ بروقان ولمدة عشر دقائق.
على بال مايطبخ البُن..نبدأ نعد ترمس القهوة بالمقادير المتبقية..
نحط اثنين ملعقة هيل بالترمس+ربع ملعقة مسمار+ربع ملعقة زعفران ..ونحط عليهم شوية موية باردة ونخلطهم..والسر هنا كيميائياً ماعندي وقت والله اشرحلكم كيميا بس باختصار حتى يتماسكون وينتشر الطعم.
بعد مرور عشر دقايق نطفي الدافور ونخلي ابريق البن المطبوخ لمدة دقيقتين حتى ينزل البُن..ثمن نسكب البن على ترمس القهوة اللي فيها الخلطة مستعينين (
بمشخال) زي ماهو موضح بالصورة.
طبعاً الهيل يلعب دور بالطعم فحاول تشوف الكمية المناسبة لك..بس انتبه تكثر مسمار وتسوي فيها راعي بعارين وتزيد الكمية..ربع ملعقة يكفي للنكهة(
فليفور)
كذا تكون قهوتك قهوة أبطال ان شاءالله..وانت اليوم اصبحت راعي مضارب بادية ينحسب لقهوتك الف حساب
&&&&&&&&
والحين مع الفطور
اليوم انا سويت فرنش كيك توست على هالصبح والكمية لشخص واحد
المقادير:
1- شيف مضبوط مثلي خخخخخ
2- اثنين بيض دجاج (
اجل بيض ديناصور!!)
3- ثلاث خبز توست
4- ملعقة صغيرة هيل
5-ربع ملعقة زعفران
6-ثلث كاسة حليب
7- ربع ملعقة فانيلا
9- زيت للقلي
نحط اول شي البيضتين بكاسة ونخضهم مع بعض
نظيف المقادير المتبقية وهن: الحليب، الهيل، الزعفران، الفانيلا ..ونخضهم خض
الشكل النهائي بعد الخض...
نحط الخلطة بصحن غمس .ونحط خبز التوست عليه وكل خبزة عشر ثواني من الجهتين حتى يشربه شرب
يعني كذا...
نسخن القلاية بحراة متوسطة وندهن عليه الزيت ...واذا احتمى نبدأ نحط التوست عليه
يعني كذا..ونبدأ نقلبه لين يصير لونه بني مع ملاحظة ان الزيت يكون متواجد وكل ما راح نزيد زيت...
ويمديك تحط زبدة والا شيرة والا عسل عليه ..وعساك بالعافية فطور صحي مع قهوة يعدل المزاج..واذا حسيت ان في خلل بالاعداد مر على اقرب بوفية وريح راسك...
كنتم مع الشيف فيصل بن محمد
ملاحظة يمنع نقل الموضوع للمنتديات الفرنسية
ملاحظة ثانيه ترى الموضوع مسروق مع تحريف الأسم
28-08-2007, 08:46 PM
بالصور ومن داخل مطبخي طريقة اعداد القهوة العربية+فرنش توست للفطور
